ບົດນຳ | ||
ລັດຖະບານ ສປປ ລາວ ພ້ອມດ້ວຍຄູ່ຮ່ວມງານດ້ານການພັດທະນາສາກົນໄດ້ໃຫ້ຄຳໜັ້ນສັນຍາວ່າການດຳເນີນການຫັນປ່ຽນໂອກາດການພັດທະນາເສດຖະກິດໃນປະຈຸບັນໄປສູ່ການພັດທະນາແບບຍືນຍົງເພື່ອນຳເອົາຜົນປະໂຫຍດມາສູ່ປະເທດຊາດ. ເຈດຈຳນົງອັນນີ້ມັນສ່ອງແສງໃຫ້ເຫັນວ່າການຕັດສິນໃຈໃນການແຊກແຊງກ່ຽວກັບ ວຽກງານພັດທະນາ ແລະ ວຽກງານນະໂຍບາຍຂອງລັດຖະບານແມ່ນໄດ້ດຳເນີນໄປບົນພື້ນຖານຄວາມຮູ້ຄວາມເຂົ້າໃຈກ່ຽວກັບຂະບວນການພັດທະນາຕ່າງໆ ທີ່ໄດ້ດຳເນີນມາ ແລະ ອີງໃສ່ຜົນໄດ້ຮັບ, ສະຖານະພາບທາງ ດ້ານເສດຖະກິດ ແລະ ສັງຄົມ. ຄວາມຮູ້ປະສົບການດັ່ງກ່າວນອກຈາກຈະສະທ້ອນໃຫ້ເຫັນພາບລວມຂອງທ່າອ່ຽງ ແລ້ວກໍ່ຍັງ ສະໜອງພາບລະອຽດກ່ຽວກັບຮູບແບບການກະຈາຍຄວາມແຕກຕ່າງທາງດ້ານເສດຖະກິດສັງຄົມ ນຳອີກດ້ວຍ.
ປື້ມແຜນທີ່ເສດຖະກິດ-ສັງຄົມຫົວນີ້ໄດ້ສະແດງໃຫ້ເຫັນບາງຕົວຊີ້ບອກກ່ຽວກັບສະພາບມະນຸດໂດຍສະເພາະແມ່ນຕໍ່ກັບປະຊາຊົນລາວ. ຕົວຊີ້ບອກເຫຼົ່ານັ້ນປະກອບດ້ວຍຊຸດແຜນທີ່ອັນລະອຽດຄົບຖ້ວນທີ່ສະແດງໃຫ້ເຫັນ ປະເດັນບັນຫາເສດຖະກິດ-ສັງຄົມຂອງພົນລະເມືອງລາວໃນດ້ານຕ່າງໆ ຢ່າງກວ້າງຂວາງ. ເປັນຄັ້ງທຳອິດທີ່ໄດ້ນຳເອົາສະຖິຕິຂໍ້ມູນຈາກການສຳຫຼວດພົນລະເມືອງມາກຳນົດສ້າງເປັນ ແຜນທີ່ໆມີຄຸນນະພາບສູງສະແດງໃຫ້ເຫັນສະພາບເສດຖະກິດ-ສັງຄົມໃນລັກສະນະເລິກເຊິ່ງກວ້າງຂວາງ ແລະ ທັງແຍກໃຫ້ເຫັນການແຈກຢາຍທາງດ້ານຂໍ້ມູນ ແລະ ທີ່ຕັ້ງຢ່າງ ລະອຽດ. ແຜນທີ່ສ່ວນໃຫຍ່ ແມ່ນໄດ້ສະແດງພາບລວມໃນລະດັບບ້ານ. ແຜນທີ່ທັງໝົດທີ່ບັນຈຸຢູ່ໃນປື້ມແຜນທີ່ນີ້ແມ່ນອີງໃສ່ຂໍ້ມູນການສຳຫລວດພົນລະເມືອງ ແລະ ທີ່ຢູ່ອາໃສ ໃນປີ 2005 ໂດຍແມ່ນກົມສະຖິຕິ (DOS) ຂອງກະຊວງແຜນການ ແລະ ການລົງທຶນ (MPI) ເປັນຜູ້ດຳເນີນການ ສຳຫລວດຍົກເວັ້ນແຜນທີ່ກ່ຽວກັບຄວາມທຸກຍາກໃນພາກ I ແລະ ແຜນທີ່ລວມໃນພາກ A. ການສຳຫລວດ ພົນລະເມືອງ ແລະ ທີ່ຢູ່ອາໃສໃນປີ 2005 ແມ່ນໄດ້ຮັບການສະໜັບສະໜຸນຊ່ວຍເຫລືອທາງດ້ານການເງິນ ແລະ ວິຊາການຈາກອົງການພັດທະນາສາກົນແຫ່ງປະເທດສະວີເດັນ (SIDA) ແລະ ໄດ້ກວມເອົາພົນລະເມືອງທັງໝົດ ຈຳນວນ 5.6 ລ້ານຄົນ ອາໄສຢູ່ໃນ 950,251 ຄົວເຮືອນໃນຈຳນວນ 10,547 ບ້ານ. ທ່ານສາມາດເບິ່ງແບບ ສອບຖາມໄດ້ໃນພາກເອກກະສານຊ້ອນທ້າຍຂອງບົດລາຍງານຜົນການສຳຫລວດພົນລະເມືອງປີ 2005 (DOS, 2005). ບົດສອບຖາມ ດັ່ງກ່າວປະກອບ ດ້ວຍຄຳຖາມ ຍ່ອຍຈຳນວນ 34 ຂໍ້ທີ່ຖາມເຖິງຄຸນລັກສະນະຂອງ ພົນລະເມືອງ ແລະ ຄົວເຮືອນ, ການສຶກສາ, ກິດຈະກຳເສດຖະກິດ, ການຍົກຍ້າຍຂອງພົນລະເມືອງ, ສຸຂະພາບ ແລະ ການເປັນພິການ, ບອ່ນຢູ່ອາໄສ ແລະ ບັນຫາອື່ນໆ. ຕົວຊີ້ບອກຄວາມທຸກຍາກແມ່ນອີງໃສ່ຕົວເລກຄາດຄະເນທີ່ໄດ້ກຳນົດຂື້ນໂດຍການລວມເອົາຕົວແປຂອງ ຄຸນລັກສະນະຂອງຄົວເຮືອນ ແລະ ຂໍ້ມູນການໃຊ້ສອຍໃນຄົວເຮືອນຈາກການສຳຫລວດຄັ້ງທີ່ III ກ່ຽວກັບ ການໃຊ້ຈ່າຍ ແລະ ການຊົມໃຊ້ຂອງຄົວເຮືອນທີ່ໄດ້ປະຕິບັດໃນປີ 2002/3 ພ້ອມດ້ວຍຕົວແປຄຸນລັກສະນະ ຂອງຄົວເຮືອນຈາກການສຳຫລວດພົນລະເມືອງ ແລະ ທີ່ຢູ່ອາໃສໃນປີ 2005. ຂໍ້ມູນເຫຼົ່ານີ້ຊ່ວຍໃຫ້ເຮົາ ສາມາດຄາດຄະເນລາຍຮັບຕໍ່ຫົວຄົນຂອງພົນລະເມືອງລາວທັງໝົດ. Swiss NCCR North-South ແລະ ສະຖາບັນຄົ້ນຄວ້ານະໂຍບາຍອາຫານສາກົນ (IFPRI) ເຮັດວຽກໄປພ້ອມກັນເພື່ອສ້າງຕົວຄາດຄະເນຂື້ນມາໂດຍນຳໃຊ້ ວິທີການຄາດຄະເນພື້ນທີ່ນ້ອຍໆ. ຂໍ້ມູນເພີ້ມເຕີມສາມາດຊອກເບິ່ງໄດ້ໃນພາກສະເພາະ (ພາກ I) ຫຼື ໃນບົດລາຍງານເພີ້ມເຕີມທີ່ໄດ້ຈັດພີມຄຽງຄູ່ກັນກັບສະໝຸດແຜນທີ່ທີ່ມີຊື່ວ່າ “ຄວາມທຸກຍາກ ແລະ ຄວາມ ບໍ່ສະເໝີພາບໃນ ສປປ ລາວ: ຮູບແບບໄລຍະການແຈກຢາຍຕາມແນວທີ່ຕັ້ງ ແລະ ຕົວກຳນົດ ທາງດ້ານ ພູມສັນຖານ” (Epprecht et al., 2008). ເວົ້າລວມແລ້ວ ແຜນທີ່ເຫຼົ່ານີ້ແມ່ນສະແດງໃຫ້ເຫັນຂໍ້ມູນໃນລະດັບບ້ານ. ຂໍ້ມູນລາຍລະອຽດທີ່ຕັ້ງບ້ານ ແລະ ເສັ້ນວາດຂອງຮູບຫຼາຍຂ້າງທີ່ສະແດງເຂດພື້ນທີ່ຂອງບ້ານຈະສາມາດເຫັນໄດ້ຢູ່ໃນບົດອະທິບາຍແຜນທີ່ A7. ໂດຍທົ່ວໄປແລ້ວ ແຜນທີ່ໃຊ້ສອງວິທີເພື່ອສະແດງຂໍ້ມູນບ້ານ. ວິທີໜື່ງນັ້ນເພີ່ນໄດ້ໃຊ້ວິທີການລະບາຍສີຂອງຮູບ ບ້ານທີ່ມີຫຼາຍດ້ານເພື່ອອະທິບາຍສະຖິຕິຂໍ້ມູນໂດຍອີງໃສ່ຄ່າສະເລັ່ຍ, ອັດຕາພົນລະເມືອງທີ່ມີຄຸນລັກສະນະ ສະເພາະ ຫຼື ປະເພດຂອງຕົວຊີ້ວັດຫລັກໃດໜຶ່ງ. ວິທີໆ ສອງ, ເພີ່ນໄດ້ໃຊ້ຈຸດນ້ອຍໆ ແລະ ເຄື່ອງໝາຍສະແດງ ບອກຕົວເລກຂໍ້ມູນ ເຊັ່ນວ່າ ຄົນທີ່ມີຄຸນລັກສະນະສະເພາະ. ຈາກການສະແດງຈຳນວນສະເພາະຂອງຄົນລົງ ໃສ່ຈຸດໜຶ່ງ, ກໍ່ຈະເຫັນໄດ້ການແຈກຢາຍຈຳນວນຈຸດທັງໝົດແບບສະໝ່ຳສະເໝີໃນທົ່ວຮູບຫຼາຍດ້ານຂອງບ້ານ. ຍ້ອນວ່າສະໝຸດແຜນທີ່ນີ້ມີຈຸດໝາຍຈະກຳນົດໃຫ້ເຫັນຮູບແບບທາງດ້ານພູມສັນຖານອີງຕາມຄຸນລັກສະນະ ຂອງເສດຖະກິດ-ສັງຄົມ ຫຼາຍກວ່າທີ່ຈະສະແດງຄ່າອັນແນ່ນອນທີ່ສາມາດພິສູດໄດ້ໃນສະເພາະບ້ານໃດໜຶ່ງ ສະນັ້ນໂດຍທົ່ວ ໄປແລ້ວ ເພີ່ນຈະບໍ່ຍົກເອົາແຜນວາດເສັ້ນສະແດງບ້ານທີ່ມີຫຼາຍດ້ານຂື້ນມາໃຫ້ເຫັນເປັນຈຸດເດັ່ນ. ປື້ມແຜນທີ່ນີ້ໄດ້ແບ່ງອອກເປັນ 9 ພາກທີ່ສຳຄັນ. ພາກທີ່ໜຶ່ງຄືພາກ A ເປັນພາກສະແດງພາບລວມດ້ານຕ່າງໆ ຂອງພູມສັນຖານຂອງ ສປປ ລາວ ເຊັ່ນ: ຮູບລັກສະນະພື້ນທີ່ໜ້າດິນ, ການຄົມ ມະນາຄົມຂົນສົ່ງ, ທີ່ດິນ ແລະ ພື້ນທີ່ປ່າໄມ້ປົກຄຸມ, ເຂດການປົກຄອງ, ແລະ ອື່ນໆ. ແຜນທີ່ໃນພາກນີ້ ແມ່ນໄດ້ຂໍ້ມູນມາຈາກແຫຼ່ງຕ່າງໆ ແລະ ໄດ້ສະແດງໄວ້ໃນເຄື່ອງໝາຍຂອງແຜນທີ່. ພາກທີສອງ ຄື ພາກ B ເປັນ ພາກປະກອບດ້ວຍແຜນທີ່ຄຸນ ລັກສະນະທົ່ວໄປຂອງພົນລະເມືອງ ແລະ ພາກທີ່ສາມ ຄື ພາກ C ສະແດງໃຫ້ເຫັນບັນຫາກ່ຽວກັບການຍົກຍ້າຍ ຂອງພົນລະເມືອງ. ພາກທີ 4 ຄື ພາກ D ເປັນພາກລວບ ລວມເອົາດ້ານຕ່າງໆ ກ່ຽວກັບການຮູ້ໜັງສື ແລະ ການສຶກສາ. ສ່ວນພາກຕໍ່ໄປ ຄື ພາກ E ເປັນພາກອະທິບາຍຄຸນລັກສະນະສຳຄັນທາງດ້ານສາທາລະນະສຸກ. ພາກທີ 6 ຄື ພາກ F ເປັນພາກສະແດງຂໍ້ມູນກ່ຽວກັບກຸ່ມຊົນເຜົ່າ ແລະ ສາດສະໜາກ່ອນທີ່ຈະສະແດງ ໃຫ້ເຫັນຕົວຊີ້ບອກຕ່າງໆກ່ຽວກັບກິດຈະກຳເສດຖະ ກິດຢູ່ໃນພາກ G. ພາກ H ເປັນພາກກ່ຽວກັບສະພາບ ເງື່ອນໄຂດ້ານການເປັນຢູ່ຂອງພົນລະເມືອງ ເຊິ່ງເປັນ ແຜນທີ່ຊຸດສຸດທ້າຍຈາກຂໍ້ມູນການສຳຫລວດປະຊາກອນ ໃນປີ 2005. ສຸດທ້າຍ, ພາກທີ I ສະແດງແຜນທີ່ກ່ຽວກັບລັກສະນະໄລຍະການແຈກຢາຍເຂດພື້ນທີ່ຄວາມ ທຸກຍາກໃນ ສປປ ລາວ ບົດອະທິບາຍປະກອບກັບແຕ່ລະແຜນທີ່ ໃນປື້ມຫົວນີ້ແມ່ນໄດ້ຂຽນ ແລະ ຮຽບຮຽງໂດຍຫຼາຍທ່ານຈາກຫຼາຍສະຖາບັນ. ຈຸດປະສົງຂອງບົດອະທິບາຍນີ້ແມ່ນເພື່ອແນະນຳ ທ່ານຜູ້ອ່ານໃນເວລາເບິ່ງ ແຜນທີ່ ແລະ ພ້ອມກັນ ນັ້ນບົດດັ່ງກ່າວກໍ່ຍັງຍົກໃຫ້ເຫັນຂໍ້ມູນກ່ຽວກັບຕົວຊີ້ບອກສະເພາະນຳອີກດ້ວຍ. ນອກຈາກນັ້ນ, ຜູ້ຂຽນບາງທ່ານ ກໍ່ຍັງຊີ້ແນະໃຫ້ຮູ້ຄວາມໝາຍຂອງແຜນທີ່ເຫຼົ່ານັ້ນນຳ. ຄວນເຂົ້າໃຈວ່າການໃຫ້ຄຳ ແນະນຳໃນລັກສະນະນີ້ກໍ່ແມ່ນ ເພື່ອກະຕຸກຊຸກຍູ້ທ່ານຜູ້ອ່ານໃຫ້ຕີຄວາມໝາຍຮູບແບບການກະຈາຍທີ່ຕັ້ງໃນແຜນທີ່ແຕ່ລະສະບັບ. ອີກດ້ານໜຶ່ງ, ຂໍສະເໜີໃຫ້ຜູ້ອ່ານຈົ່ງປຽບທຽບແຜນທີ່ໂດຍເປີດໄປເປິດມາເບິ່ງໃຫ້ທົ່ວໃນປຶ້ມສະໝຸດແຜນທີ່ເພື່ອກວດຫາຄວາມ ສຳພັນກັນ, ການຕໍ່ເຕີມເສີມກັນ ແລະ ການຊ້ຳ ຊ້ອນກັນ ຂອງຄຸນລັກສະນະທາງດ້ານເສດຖະກິດສັງຄົມ. ປື້ມແຜນທີ່ນີ້ສ້າງຂື້ນມາກໍ່ເພື່ອຈຸດປະສົງແນ່ໃສ່ເຮັດແນວໃດໃຫ້ການແຈກຢາຍໄປຮອດໄປເຖິງມືຂອງທ່ານຜູ້ອ່ານຫຼາຍຄົນເທົ່າທີ່ຈະຫຼາຍໄດ້. ແຜນທີ່ນີ້ປະກອບດ້ວຍສະຖິຕິຂໍ້ມູນກ່ຽວກັບຄຸນລັກສະນະເສດຖະກິດສັງຄົມ ແລະ ການແຈກຢາຍຂອງພົນລະເມືອງລາວທີ່ເປັນໜ້າສົນໃຈຢ່າງຍິ່ງສຳລັບບັນດາ ທ່ານ ຜູ້ອ່ານທົ່ວໄປ, ນັັກສຶກສາ ແລະ ນັກຄົ້ນຄວ້າ, ຜູ້ຕັດສິນບັນຫາ ແລະ ຜູ້ກຳນົດນະໂຍບາຍ. ນອກຈາກນີ້ພວກເຮົາຍັງພະຍາຍາມປັບປຸງເພື່ອເຂົ້າໄປຫາຂໍ້ມູນຕົວຈີງທີ່ມີຢູ່ ແລະ ທັງນີ້ກໍ່ເພື່ອປັບປຸງ ແລະ ເສີມຂະຫຍາຍຄວາມຮູ້ທົ່ວໄປກ່ຽວກັບສະພາບ ເສດຖະກິດ-ສັງຄົມດ້ວຍວິທີການແຈກຢາຍສະໝຸດແຜນທີ່ ນີ້ອອກສູ່ສັງຄົມໃຫ້ກວ້າງຂວາງໂດຍຜ່ານອົງການ ຈັດຕັ້ງການປົກຄອງຂອງລັດຖະບານ ແລະ ອົງການບໍລິຫານ ແລະ ສະຖາບັນການສຶກສາຕ່າງໆ ພ້ອມທັງ ແຈກຢາຍໄປສູ່ຫ້ອງສະໝຸດສາທາລະນະ ແລະ ຜ່ານທາງອິນເຕີເນັດເພື່ອໃຫ້ບຸກຄົນຜູ້ທີ່ມີ ຄວາມສົນໃຈທົ່ວໄປໃນ ສັງຄົມມີໂອກາດໄດ້ອ່ານ ແລະ ຊົມໃຊ້ກັນຢ່າງທົ່ວເຖິງ. ພວກເຮົາຫວັງວ່າປື້ມ ແຜນທີ່ຊຸດນີ້ຈະເປັນປັດໃຈ ໜຶ່ງທີ່ຊ່ວຍກະຕຸກ ຊຸກຍູ້ສັງຄົມໃຫ້ເກີດການສົນທະນາກັນກ່ຽວກັບຄຸນລັກສະນະເສດຖະກິດສັງຄົມຂອງປະເທດ ແລະ ການພັດທະນາປະເທດຊາດໃນອະນາຄົດ. ດ້ວຍວີທີການນີ້ ພວກເຮົາຫວັງວ່າ ຈະເປັນການປະກອບ ສ່ວນສຳຄັນເຂົ້າໃນການເຊື່ອມ ຕໍ່ຄວາມຮູ້ ແລະ ການຕັດສິນໃຈ ຊຶ່ງຈະນຳໄປສູ່ການພັດທະນາ ອັນຍືນຍົງ ແລະ ມີຄວາມສະເໝີພາບໃນສັງຄົມຂອງ ສປປ ລາວ. |