ສປປ ລາວ ເປັນປະເທດທີ່ບໍ່ຊາຍແດນຕິດກັບທະເລມີເນື້ອທີ່ທັງໝົດ 236,800 ກິໂລແມັດ ມົນທົນ ແລະ ຕັ້ງຢູ່ທິດຕາເວັນອອກສ່ຽງໃຕ້ຂອງທະວີບອາຊີຢູ່ໃຈກາງຂອງແຫລມ ອິນດູຈີນ ແລະ ມີຊາຍແດນຕິດຈອດກັນກັບ ປະເທດກຳປູເຈຍ, ມຽນມາ, ໄທ, ຫວຽດນາມ ແລະ ຈີນ ແລະ ທີ່ຕັ້ງທາງດ້ານພູມມີປະເທດເປັັນເຂດ ກັນຊົນລະຫວ່າງປະເທດເພື່ອນບ້ານ ທັງເປັນເສັ້ນທາງຜ່ານສຳຄັນ ດ້ານການຄ້າ ແລະ ການຄົມມະນາຄົມ. ສປປ ລາວ ມີທີ່ຕັ້ງຍາວຢຽດໄປຕາມຊີກໂລກເໜືອ ນັບແຕ່ເສັ້ນສູນສູດຂຶ້ນມາ ແລະ ຢູ່ໃນເຂດອາກາດອົບອຸ່ນ. ແມ່ນ້ຳຂອງກວມເອົາເສັ້ນຊາຍແດນສ່ວນໃຫຍ່ລະຫວ່າງ ສປປ ລາວ ກັບປະເທດໄທທາງດ້ານທິດ ຕາເວັນຕົກ ແລະ ມີສາຍອານາມຍາວຢຽດເປັນເສັ້ນຊາຍແດນຕິດຈອດກັບປະເທດຫວຽດນາມ. ຄອນພະເພັງຢູ່ເຂດໃຕ້ສຸດຂອງປະເທດເປັນຄອນປິດກັ້ນແມ່ນ້ຳໄປສູ່ທະເລແຕ່ດ້ານທິດເໜືອຂອງຄອນ ພະເພັງເຮືອບັນທຸກສິນຄ້າສາມາດທຽວໄປມາໄດ້ເກືອບທຸກ ລະດູການ ຕະຫລອດໄລຍະຄວາມຍາວ ຂອງ ລາວຕາມແລວນ້ຳຂອງ.
ພູມສັນຖານຂອງປະເທດລາວສ່ວນໃຫຍ່ເປັນເຂດພູດອຍມີລະດັບຄວາມສູງກວ່າ 500 ແມັດ ແລະ ພື້ນທີ່ຂອງ ປະເທດມີລັກສະນະສູງຊັນ, ປະກອບດ້ວຍຮ່ອມພູເຂົາແຄບທີ່ເປັນສາຍນ້ຳ ແລະ ມີທີ່ດີນ ທີ່ມີທ່າແຮງດ້ານກະສິກຳຕ່ຳ. ຢູ່ໃນພາກໃຕ້ຂອງປະເທດມີເຂດພື້ນທີ່ມີຂະໜາດກວ້າງ ຂວາງໃນແຂວງ ສະຫວັນນະເຂດ ແລະ ແຂວງຈຳປາສັກ. ພື້ນທີ່ເຫຼົ່ານີ້ເໝາະແກ່ການປູກເຂົ້າ ແລະ ລ້ຽງສັດເປັນຢ່າງຍິ່ງ. ພື້ນທີ່ດັ່ງກ່າວນັ້ນເປັນພື້ນທີ່ຮາບພຽງເປັນດິນທີ່ນ້ຳພັດມາຄ້າງໄວ້ ແລະ ຊັນຢູ່ຕາມພູຕາມ ແຄມແມ່ນ້ຳຂອງ ແລະ ເປັນສາຂາຂອງແມ່ນ້ຳຂອງທັງສອງສີ່ງນີ້ປົກຄຸມພຽງແຕ່ ປະມານ 20% ຂອງພື້ນທີ່ດິນ ທີ່ມີພື້ນທີ່ເໝາະແກ່ການປູກຝັງ ຄາດວ່າມີປະມານ 4 - 5% ຂອງພື້ນທີ່ທັງໝົດຂອງປະເທດ.
ປື້ມແຜນທີ່ນີ້ສະໜອງຂໍ້ມູນພົນລະເມືອງຂອງປະເທດ ສປປ ລາວ ໄດ້ອະທິບາຍຄຸນລັກສະນະ ເສດຖະກິດ-ສັງຄົມດ້ານຕ່າງໆ ອັນສະທ້ອນໃຫ້ເຫັນວິຖີທາງຂອງຊີວິດ. ພາບທີ່ນຳມາສະເໜີນັ້ນແມ່ນ ພາບສະແດງໃຫ້ເຫັນຜົນໄດ້ຮັບຈາກການພັດທະນາໃນເມື່ອກ່ອນ ແລະ ສະພາບການເບື້ອງຕົ້ນສຳລັບ ການພັດທະນາໃນອະນາຄົດ. ເຖິງຢ່າງໃດກໍ່ຕາມ, ຕໍ່ກັບຄວາມຄິດເຫັນສອງຢ່າງນີ້ຄວນຮັບຮູ້ວ່າຄຸນ ລັກສະນະເສດຖະກິດ-ສັງຄົມມີການພົວພັນຊຶ່ງກັນ ແລະ ກັນຢ່າງສະໜິດແໜ້ນກັບປັດໃຈດ້ານອື່ນໆ; ໃນນັ້ນບໍ່ພຽງແຕ່ປັດໃຈທາງດ້ານສະພາບແວດລ້ອມ ແລະ ການນຳໃຊ້ດິນ ແລະ ຊັບພະຍາກອນທຳ ມະຊາດເທົ່ານັ້ນແຕ່ຫາກຍັງພົວພັນເຖິງຄວາມສົນໃຈຂອງຝ່າຍຕ່າງໆ ທີ່ຈັດວາງ ແລະ ຊີ້ນຳການ ພັດທະນາໂດຍຜ່ານການແຊກແຊງ ແລະ ນະໂຍບາຍຕ່າງໆ.
ເພາະສະນັ້ນພາກທຳອິດນີ້ຈຶ່ງນຳສະເໜີການຄັດເລືອກແຜນທີ່ໆ ບໍ່ພົວພັນໂດຍກົງຕໍ່ການສຳຫລວດ ພົນລະເມືອງ ແລະ ທີ່ຢູ່ອາໃສຂອງ ປີ 2005 ແຕ່ເປັນການສະເໜີເຖິງແຫລ່ງຂໍ້ມູນອື່ນຫຼາຍກວ່າ. ແຜນທີ່ ວາດຊີ້ໃຫ້ເຫັນເຖິງແຫຼ່ງຊັບພະຍາກອນທຳມະຊາດ ແລະ ການຊົມໃຊ້ຊັບພະຍາກອນໃນປະຈຸບັນ ແລະ ການແບ່ງເຂດການປົກຄອງພ້ອມດ້ວຍຮູບລັກສະນະຂອງໜ້າດິນ ແລະ ເຄືອຂ່າຍເສັ້ນທາງຂົນສົ່ງ. ນອກເໜືອໄປກວ່ານັ້ນ, ພວກເຮົາຍັງວິໄຈຄວາມສາມາດໃນການເຂົ້າເຖິງພາຍໃນປະເທດ ແລະ ພົນລະເມືອງ ໃນດ້ານເວລາໃຊ້ເດີນທາງຈາກໃຈກາງເມືອງ. ບັນຫານີ້ຊ່ວຍໃນການປະເມີນບໍ່ພຽງສະເພາະແຕ່ ລະດັບ ຄວາມສາມາດຂອງປະຊາຊົນເຂດຊົນນະບົດໃນການເຂົ້າໄປຮອດໄປເຖິງການບໍລິການ ແລະ ໂອກາດໃນໄປເຖິງຕະຫລາດໃນຕົວເມືອງເທົ່ານັ້ນ ແຕ່ຫາກຍັງສາມາດຊ່ວຍໃຫ້ເຫັນພາບວ່າການບໍລິການ ແລະ ການປະຕິບັດນະໂຍບາຍໄປຮອດໄປເຖິງເຂົາເຈົ້າໄດ້ແນວໃດ. ສຸດທ້າຍ, ການກຳນົດກຸ່ມເປົ້າໝາຍ ຍຸດທະສາດຂອງລັດຖະບານກ່ຽວກັບການຫລຸດຜ່ອນຄວາມທຸກຍາກຂອງເມືອງ, ຍຸດທະສາດ ການເຕີບໂຕ ແລະ ການລຶບລ້າງຄວາມທຸກຍາກແຫ່ງຊາດ (NGPES) ກໍ່ຍັງໄດ້ນຳມາສະເໜີເພື່ອ ເປັນບ່ອນອີງ.
ພວກເຮົາຫວັງວ່າແຜນທີ່ໃນພາກນີ້ຈະບໍ່ສະໜອງພຽງແຕ່ຂໍ້ມູນຄວາມເປັນມາສຳຄັນເທົ່ານັ້ນແຕ່ຍັງຈະ ຊ່ວຍກະຕຸ້ນຜູ້ອ່ານທີ່ມີຄວາມສົນໃຈອ່ານກັບໄປມາ ແລະ ປຽບທຽບໄລຍະຮູບແບບການແຈກຢາຍຂອງ ຄວາມແຕກຕ່າງດ້ານເສດຖະກິດສັງຄົມທີ່ກ່ຽວພັນກັບຄຸນລັກສະນະອັນສຳຄັນເຫຼົ່ານີ້ນຳອີກ ດ້ວຍ.