G.4    
 
ການ​ຫວ່າງ​ງານ    
 

ພົນ​ລະ​ເມືອງ​ຫວ່າງ​ງານ​ໝາຍ​ເຖິງ​ຄົນ​ທີ່​ມີ​ອາ​ຍຸ 10 ປີ ແລະ ສູງ​ກວ່າ​ທີ່​ສາ​ມາດ​ເຮັດ​ວຽກ​ກ່ຽວ​ກັບ​ກິດ​ຈະ​ກຳ ເສດ​ຖະ​ກິດ​ໄດ້​ແຕ່​ຂາ​ດວຽກ​ເຮັດ​ງານ​ທຳ ຫຼື ຍັງ​ຊອກ​ຫາ​ວຽກ​ເຮັດ​ງານ​ທຳ​ໃນ​ໄລ​ຍະ 12 ເດືອນ​ກ່ອນ​ການ ສຳ​ຫລວດ​ພົນ​ລະ​ເມືອງ. ຕາຕະລາງ 7 ສະ​ແດງ​ໃຫ້​ເຫັນ​ແຈ້ງ​ພາກ​ສ່ວນ​ພົນ​ລະ​ເມືອງ​ທີ່​ໄດ້​ຍົກ​ຂື້ນ​ມາ​ອ້າງ​ອີງ​ດ້ວຍ​ອັດ​ຕາ​ສ່ວນ​ການ​ຫວ່າງ​ງານ. ໃນ​ປີ 2005, ປະ​ຊາ​ຊົນ​ຜູ້​ທີ່​ບອກ​ວ່າ​ເຂົາ​ເຈົ້າ​ຫວ່າງ​ງານ​ມີ​ເຖິງ 1.4% ຂອງ ພົນ​ລະ​ເມືອງ​ທີ່​ເຮັດ​ວຽກ​ກ່ຽວ​ກັບ​ກິດ​ຈະ​ກຳ​ເສດ​ຖະ​ກິດ​ຢູ່​ໃນ ສປປ ລາວ.
ແຜນ​ທີ່​ນີ້​ໄດ້​ສະ​ແດງ​ໃຫ້​ເຫັນ​ຕົວ​ຊີ້​ບອກ​ການ​ຫວ່າງ​ງານ 2 ຢ່າງ. ອັນ​ທີ​ໜື່ງ​ພວກ​ເຮົາ​ສາ​ມາດ​ເຫັນ​ການ​ແຈກ​ຢາຍ ຂອງ​ຈຸດ​ຕ່າງໆ ຊຶ່ງ​ທຸກໆຈຸດ​ແທນ​ໃຫ້​ຄົນ​ຫວ່າງ​ງານ 5 ຄົນ. ຕົວ​ຊີ້​ບອກ​ທີ​ສອງ​ແມ່ນ​ສີ​ທີ່​ແຕກ​ຕ່າງ​ກັນ​ສຳ​ລັບ​ແຕ່​ລະ ບ້ານ, ຊຶ່ງ​ສີ​ນັ້ນ​ແທນ​ໃຫ້​ອັດ​ຕາ​ສ່ວນ​ຂອງ​ພົນ​ລະ​ເມືອງ​ຫວ່າງ​ງານ​ໃນ​ບ້ານ. ພວກ​ເຮົາ​ສາ​ມາດ​ຈຳ​ແນກ​ໃຫ້​ເຫັນ ຄວາມ​ແຕກ​ຕ່າງ​ກັນ​ດ້ວຍ 5 ລະ​ດັບ ທີ່​ມີ​ອັດ​ຕາ​ສ່ວນ​ຄົນ​ຫວ່າງ​ງານ​ຕ່ຳ​ສຸດ​ແມ່ນ​ແທນ​ດ້ວຍ​ສີ​ຈາງ​ຄື​ຕ່ຳ​ກວ່າ 0.5%. ສ່ວນ​ສີ​ມ້ວງ​ນັ້ນ​ແມ່ນ​ແທນ​ໃຫ້​ອັດ​ຕາ​ສ່ວນ​ຄົນ​ຫວ່າງ​ງານ​ສູງ​ສຸດ​ຄື​ສູງ​ກວ່າ 2%. ຈາກ​ການ​ນຳ​ໃຊ້​ສອງ​ຕົວ​ຊີ້​ບອກ ນີ້​ພວກ​ເຮົາ​ກໍ່​ສາ​ມາດ​ເຫັນ​ໄດ້​ໂລ​ດວ່າ​ໃນ​ບາງ​ບ້ານ​ມີ​ຈຳ​ນວນ​ຄົນ​ຫວ່າງ​ງານ​ສູງ​ຫຼາຍ (ບ່ອນ​ທີ່​ມີ​ຫຼາຍ​ຈຸດ) ເຖີງ​ແມ່ນ​ວ່າ​ອັດ​ຕາ​ການ​ຫວ່າງ​ງານ​ມີ​ຂ້ອນ​ຂ້າງ​ຕ່ຳ (ສີ​ຈາງ). ບັນ​ຫາ​ນີ້​ສາ​ມາດ​ອະ​ທິ​ບາຍ​ໄດ້​ຈາກ​ຄວາມ​ຈິງ​ທີ່​ວ່າ​ອັດ​ຕາ ສ່ວນ​ຕ່ຳ​ແມ່ນ​ຄູນ​ດ້ວຍ​ຈຳ​ນວນ​ພົນ​ລະ​ເມືອງ​ທັງ​ໝົດ​ທີ່​ມີ​ຫຼາຍ​ແຕ່​ຜົນ​ໄດ້​ຮັບ​ອອກ​ມາ​ກໍ່​ຍັງ​ມີ​ຈຳ​ນວນ​ພົນ​ລະ​ເມືອງ ຫວ່າງ ງານ​ຫຼາຍ​ຢູ່​ດີ. ໃນ​ດ້ານ​ກົງ​ກັນ​ຂ້າມ​ກັນ​ແລ້ວ, ບ້ານ​ນ້ອຍ​ເຖິງ​ວ່າ​ຈະ​ມີ​ອັດ​ຕາ​ສ່ວນ ພົນ​ລະ​ເມືອງ​ຫວ່າງ​ງານ ສູງ​ກໍ່​ຕາມ - ແຕ່​ຈະ​ບໍ່​ມີ​ຄົນ​ຫ່ວ​າງ​ງານ​ຫຼາຍ.
ໂດຍ​ພາ​ບລວມ​ແລ້ວ ແຜນ​ທີ່ G.4 ສະ​ແດງ​ໃຫ້​ເຫັນ​ວ່າ ການ​ຫ່ວ​າງ​ງານ​ແມ່ນ​ປະ​ກົດ​ການ​ໜຶ່ງ​ທີ່​ມີ​ຈຳ​ກັດ​ຢູ່​ສະ​ເພາະ ໃນ​ແຕ່​ເຂດ​ຕົວ​ເມືອງ ແລະ ເຂດ​ໃກ້​ຄຽງ​ຕົວ​ເມືອງ​ອ້ອມ​ຂ້າງ​ເທດ​ສະ​ບານ​ແຂວງ. ຍົກ​ເວັ້ນ​ໃນ​ຮູບ​ແບ​ບລວມ​ເຮົາ ສາ​ມາດ​ເຫັນ​ໄດ້​ອັດ​ຕາ​ຫວ່າງ​ງານ​ໃນ​ແຂວງ​ຄຳ​ມ່ວນ ແລະ ໄຊ​ຍະ​ບູ​ລີ, ໃນ​ເຂດ​ພິ​ເສດ​ໄຊ​ສົມ​ບູນ, ແລະ ໃນ​ບາງ ແຂວງ​ພາກ​ໃຕ້​ທີ່​ຍັງ​ມີ​ອັດ​ຕາ​ສ່ວນ​ຄົນ​ຫວ່າງ​ງານ​ສູງ​ກວ່າ 2%. ເຖິງ​ຢ່າງ​ໃດ​ກໍ່​ຕາມ, ຄວນ​ເຂົ້າ​ໃຈ​ວ່າ​ບ້ານ​ຈຳ​ນວນ ໜຶ່ງ​ເປັນ​ບ້ານ​ນ້ອຍ​ຫຼາຍ ແລະ ຈຳ​ນວນ​ທີ່​ສະ​ແດງ​ດ້ວຍ​ຈຸດ​ຕ່າງໆທີ່​ກຳ​ນົດ​ໄວ້​ນັ້ນ​ອາດ​ຈະ​ສະ​ແດງ​ເປັນ​ຕົວ​ຊີ້​ບອກ ໄດ້​ດີ​ກວ່າ​ອັດ​ຕາ​ສ່ວນ​ຄົນ​ຫວ່າງ​ງານ​ຂອງ​ບ້ານ.
ເຖິງ​ແມ່ນ​ວ່າ​ສູນ​ເສດ​ຖະ​ກິດ​ຈະ​ສະ​ໜອງ​ຈຳ​ນວນ​ງານ​ທີ່​ຫລາກ​ຫຼາຍ​ກວ່າ​ກໍ່​ຕາມ ແຕ່​ວຽກ​ງານ​ເຫຼົ່າ​ນີ້​ອາດ​ຈະ​ບໍ່ ແທດ​ເໝາະ​ກັບ​ສະ​ພາບ​ເງື່ອນ​ໄຂ​ຂອງ​ຜູ້​ຊອກ​ຫາ​ວຽກ​ເຮັດ​ງານ​ທຳ. ຄົນ​ຂາດ​ການ​ສຶກ​ສາ​ໃນ​ເຂດ​ຕົວ​ເມືອງ​ຫຼາຍ ຄົນ​ບໍ່​ສາ​ມາດ​ຊອກ​ຫາ​ວຽກ​ໄດ້. ໜຶ່ງ​ໃນ​ຫຼາຍ​ເຫດ​ຜົນ​ຂອງ​ຄົນ​ເຄື່ອນ​ຍ້າຍ​ຈາກ​ຊົນ​ນະ​ບົດ​ເຂົ້າ​ໄປ​ຕົວ​ເມືອງ​ກໍ່ ແມ່ນ​ຄວາມ​ຫວັງ​ທີ່​ຈະ​ເຂົ້າ​ເຖິງ​ການ​ບໍ​ລິ​ການ​ທີ່​ດີ​ກວ່າ ແລະ ໂອ​ກາດ​ຊອກ​ຫາ​ວຽກ​ເຮັດ​ງານ​ທຳ​ດີ​ກວ່າ. ຍັງ​ບໍ່​ພຽງ ເທົ່າ​ນັ້ນ, ສ່ວນ​ຫຼາຍ​ແລ້ວ​ຄົນ​ຍັງ​ຂາດ​ການ​ອົບ​ຮົມ​ທີ່​ຈຳ​ເປັນ ດ້ວຍ​ເຫດ​ນັ້ນ​ພວກ​ເຂົາ​ຈຶ່ງ​ບໍ່​ສາ​ມາດ​ຊອກ​ວຽກ​ເຮັດ ໄດ້. ເຂດ​ພູ​ດອຍ​ພາກ​ເໜືອ​ຂອງ​ປະ​ເທດ​ເປັນ​ເຂດ​ທີ່​ສະ​ໜອງ​ໂອ​ກາ​ດວຽກ​ເຮັດ​ງານ​ທຳ​ຈຳ​ກັດ​ຢູ່​ໃນ.

ເພື່ອ​ຈະ​ສະ​ຫລຸບ​ສັງ​ລວມ​ໃຫ້​ເຫັນ​ພາບ​ໄດ້​ນັ້ນ​ຄວນ​ສັງ​ເກ​ດວ່າ ສປປ ລາວ ມີ​ອັດ​ຕາ​ຄົນ​ຫວ່າງ​ງານ​ຕ່ຳ​ກວ່າ ປະ​ເທດ​ອື່ນໆ ໃນ​ເຂດ​ອາ​ຊີ​ຕາ​ເວັນ​ອອກ​ສ່ຽງ​ໃຕ້. ເຖິງ​ຢ່າງ​ໃດ​ກໍ່​ຕາມ, ອັດ​ຕາ​ສ່ວນ​ອັນ​ນີ້​ກໍ່​ຍັງ​ຖື​ວ່າ​ເປັນ​ອັດ​ຕາ​ສ່ວນ ທີ່​ນ້ອຍ​ຫຼາຍ​ເພາະ​ວ່າ​ປະ​ຊາ​ຊົນ​ຫຼາຍ​ຄົນ​ເຂົ້າ​ຮ່ວມ​ໃນ​ວຽກ​ງານ​ກະ​ສິ​ກຳ, ຫຼາຍ​ຄົນ​ກໍ່​ເປັນ​ຊາວ​ນາ​ທີ່​ກູ້ມ​ກີນ (ເບິ່ງ​ແຜນ​ທີ່ G.6). ສ່ວນ​ວ່າ​ວຽກ​ງານ​ອື່ນ​ທີ່​ນອກ​ເໜືອ​ວຽກ​ກະ​ສິ​ກຳ​ນັ້ນ, ອັດ​ຕາ​ສ່ວນ​ຄົນ​ຫວ່າງ​ງານ​ໃນ​ດ້ານ ນີ້​ຈະ​ມີ​ສູງ​ກວ່າ. ເພາະ​ສະ​ນັ້ນ ການ​ຫວ່າງ​ງານ​ຈຶ່ງ​ເປັນ​ບັນ​ຫາ ທ້າ​ທາຍ​ອັນ​ໜຶ່ງ​ໃຫ້​ແກ່​ລັດ​ຖະ​ບານ ສປປ ລາວ, ໂດຍ​ສະ​ເພາະ​ກໍ່​ແມ່ນ​ນັກ​ວາງ​ແຜນ​ພັດ​ທະ​ນາ ແລະ ຜູ້​ກຳ​ນົດ​ນະ ໂຍ​ບາຍ​ທັງ​ຫຼາຍ​ຈະ​ຕ້ອງ​ເອົາ​ໃຈ​ໃສ່​ສະ​ເພາະ ໃນ​ດ້ານ​ການ​ສະ​ໜອງ​ວຽກ​ເຮັດ​ງານ​ທຳ​ໃຫ້​ມີ​ພຽງ​ພໍ ແລະ ພັດ​ທະ​ນາ​ກຳ​ລັງ​ງານ​ທີ່​ມີ​ສີ​ມື​ໃນ​ແຕ່​ລະ​ພາກ​ຂອງ ປະ​ເທດ​ເພື່ອ​ໃຫ້​ສາ​ມາດ​ຕອບ​ສະ​ໜອງ​ກັບ​ຄວາມ​ຕ້ອງ​ການ​ແຮງ​ງານ​ຈາກ​ປະ​ເທດ​ອື່ນ.

 

 


ຖ້າຫາກທ່ານຕ້ອງການແຜນທີ່ ທີ່ມີ
ຄວາມລະອຽດສູງ, ກະລຸນາດາວໂຫຼດຈາກ PDF