ຄຳນຳ | ||
ນັບແຕ່ໄດ້ມີການປະຕິຮູບທາງດ້ານເສດຖະກິດໃນທ້າຍທົດສະວັດທີ 80 ເປັນຕົ້ນມາ ເສດຖະກິດຂອງ ສປປ ລາວ ໄດ້ເຕີບໃຫຍ່ຂະຫຍາຍຕົວຢ່າງສະໝ່ຳສະເໝີ ແລະ ບໍ່ຢຸດຢັ້ງ. ນອກຈາກການປ່ຽນແປງທາງດ້ານເສດຖະກິດ ແລ້ວ, ການເຕີບໂຕຂອງເສດຖະກິດຍັງເປັນປັດໃຈນຳເອົາການປ່ຽນແປງໃໝ່ສຳຄັນມາສູ່ປະຊາຊົນອັນເຮັດ ໃຫ້ເຂົາເຈົ້າສາມາດດຳເນີນການດຳລົງຊີວິດຂອງຕົນ ໃຫ້ມີຄວາມຍືນຍົງ ແລະ ສາມາດແກ້ໄຂສະພາບບັນຫາ ຊີວິດ ປະຈຳວັນຂອງຕົນໄດ້. ເຖິງຢ່າງໃດກໍ່ຕາມ, ຍ້ອນວ່າການປ່ຽນແປງເຫຼົ່ານີ້ມີລະດັບແຕກຕ່າງກັນໄປໃນ ຂອບເຂດທົ່ວປະເທດ ສປປ ລາວ ເຊັ່ນວ່າບາງທ້ອງຖິ່ນກໍ່ມີການປ່ຽນແປງໄວກ່ວາທ້ອງຖິ່ນອື່ນ, ບັນຫາ ແລະ ທ່າແຮງໃນການພັດທະນາ ໃນ ສປປ ລາວ ອາດມີລັກສະນະແຕກຕ່າງກັນໄປອີງຕາມສະພາບຂອງທ້ອງຖິ່ນ.
ລັດຖະບານ ສປປ ລາວ ພາຍໃຕ້ການຮ່ວມມືກັບຜູ້ຮ່ວມງານດ້ານການພັດທະນາສາກົນໄດ້ອຸທິດຕົນໃຫ້ການຊຸກຍູ້ສະໜັບສະໜຸນ ແລະ ຊີ້ແນະບັນດາການປ່ຽນແປງເຫຼົ່ານີ້ໂດຍຜ່ານກອບນະໂຍບາຍ ແລະ ຂະບວນການ ຕັດສິນໃຈທີ່ມີລັກສະນະຄົບຖ້ວນພຽງພໍເພື່ອໃຫ້ບັນລຸຄວາມຕ້ອງການ. ຍ້ອນແນວນັ້ນຈຸດມຸ້ງໝາຍຂອງ ລັດຖະບານບໍ່ພຽງແຕ່ຈະແນ່ໃສ່ສ້າງຄວາມດຸ່ນດ່ຽງທາງດ້ານເສດຖະກິດທີ່ເລັ່ງເປົ້າໝາຍໃສ່ດ້ານສັງຄົມ ແລະ ສິ່ງແວດລ້ອມເທົ່ານັ້ນ ແຕ່ຍັງຫາກຍັງລວມໄປເຖິງຄວາມຈຳເປັນ ແລະ ທ່າແຮງຂອງເຂດພື້ນທີ່ຕ່າງໆ ນຳອີກດ້ວຍ. ເພາະສະນັ້ນ, ການຕັດສິນໃຈຕ່າງໆ ຈະຕ້ອງ ດຳເນີນໄປບົນພື້ນຖານຄວາມຮູ້ປະສົບການຈາກຂະບວນການ ພັດທະນາທີ່ໄດ້ດຳເນີນໄປໃນ ແຕ່ລະທ້ອງຖິ່ນ ຕ່າງກັນໃນປະເທດ ແລະ ບົນພື້ນຖານຜົນຄາດກະວ່າຈະໄດ້ຮັບໃນ ອະນາຄົດຈາກການປະຕິບັດ ນະໂຍບາຍ ແລະ ການຕັດສິນໃຈ. ສປປ ລາວ ໂດຍມີກົມສະຖິຕິ, ກະຊວງແຜນການ ແລະ ການລົງທຶນໄດ້ດຳເນີນການເກັບກຳ ແລະ ລວບລວມ ສະຖິຕິຂໍ້ມູນຢ່າງມີຄວາມຄືບໜ້າ ແລະ ໄດ້ປະສົບຜົນສຳເລັດເປັນຢ່າງດີ. ການສຳຫລວດພົນລະເມືອງ ແລະ ທີ່ຢູ່ອາໃສຄັ້ງຫລ້າສຸດທີ່ໄດ້ດຳເນີນໄປໃນເດືອນມີນາ ປີ 2005 ນັ້ນໄດ້ສະໜອງສະຖິຕິຂໍ້ມູນໃໝ່ຫລ້າສຸດ ຂອງຄົວເຮືອນພົນລະເມືອງລາວທັງໝົດທົ່ວ ປະເທດ. ການສຳຫລວດພົນລະເມືອງ ແລະ ທີ່ຢູ່ອາໃສໄດ້ເກັບກຳ ແລະ ລວບລວມເອົາສະຖິຕິສຳຄັນ ຫຼາຍດ້ານຊຶ່ງ ຂໍ້ມູນສະຖິຕິດັ່ງກ່າວນັ້ນໄດ້ນຳມາວິໄຈ ແລະ ສະເໜີໃຫ້ເຫັນ ຢູ່ໃນຕາຕະລາງສັງລວມ ສະຖິຕິຂໍ້ມູນ ແລະ ໃນບົດລາຍງານຫຼາຍສະບັບ. ມາຮອດດຽວນີ້, ເພີ່ນໄດ້ພະຍາຍາມສະເໜີ ແລະ ວິໄຈຂໍ້ມູນນີ້ເປັນແຕ່ລະໄລຍະມາທັງນີ້ກໍ່ເພື່ອເຮັດໃຫ້ຜົນຂອງການວິໄຈນັ້ນໄປຮອດໄປເຖິງບັນດານັກຄົ້ນຄວ້າ ແລະ ຜູ້ກຳນົດນະໂຍບາຍໃຫ້ກວ້າງໄກຂື້ນຕື່ມ. ປະຈຸບັນຄວາມພະຍາຍາມໃນສິ່ງດັ່ງກ່າວນີ້ສາມາດເກີດເປັນຈິງໄດ້້ພາຍໃຕ້ການຮ່ວມມືກັບຄະນະກຳມາທິການແມ່ນ້ຳຂອງແຫ່ງຊາດລາວ ແລະ ສູນແຫ່ງຊາດຂອງປະເທດສະວິດເຊີແລັນ ດ້ານການສົ່ງເສີມຄວາມສາມາດ (NCCR) ແລະ ການສະໜັບສະໜຸນອັນມີຄ່າຈາກອົງການ ພັດທະນາ ແລະ ການຮ່ວມມືຂອງປະເທດສະວິດເຊີແລນ (SDC). ການຮ່ວມມືທີ່ມີີໝາກຜົນ ແລະ ມີການປ່ຽນແປງໃໝ່ໃນທາງສ້າງສັນລະຫວ່າງອົງການຈັດຕັ້ງຂອງລາວ ແລະ ການຂະຫຍາຍການຮ່ວມມືອັນດີຂອງການຈັດຕັ້ງຝ່າຍລາວຮ່ວມກັບຄູ່ຮ່ວມງານຝ່າຍສະວີດເຊີແລນນີ້ມັນໄດ້ສະໜອງເງື່ອນໄຂໃຫ້ມີຕາຕະລາງສະຖິຕິຂໍ້ມູນຄົບຖ້ວນທີ່ອຸດົມສົມບູນ ແລະ ເປັນລະບົບດີເພື່ອຕີຄວາມໝາຍມາເປັນຂໍ້ມູນໃນຮູບແບບການແຈກຢາຍ. ຖານຂໍ້ມູນນີ້ເປັນປັດໃຈ ພາໃຫ້ເກີດມີຊຸດແຜນທີ່ດີຈີຕໍທີ່ມີຂໍ້ມູນລະອຽດຄົບຖ້ວນ ແລະ ສາມາດນຳໄປໃຊ້ເພື່ອສະແດງຂໍ້ມູນໄດ້. ແຜນທີ່ດີຈີຕໍນີ້ຍັງເປັນສິ່ງເອື້ອອຳນວຍໃຫ້ແກ່ການວິໄຈຢູ່ພາຍ ໃນຊຸດຂໍ້ມູນພົນລະເມືອງພ້ອມ ດ້ວຍ ຂໍ້ມູນອ້າງອີງທີ່ມີລັກສະນະແຈກຢາຍຈາກແຫລ່ງຂໍ້ມູນອື່ນໆ ນຳອີກດ້ວຍ. ສະໝຸດແຜນທີ່ ເສດຖະກິດ - ສັງຄົມຂອງ ສປປ ລາວ ໃນປະຈຸບັນແມ່ນສະໝຸດແຜນທີ່ຊະນິດທີສອງສ້າງຂື້ນມາ ເພື່ອຈຸດປະສົງສອງຢ່າງຄື: ອັນທີໜຶ່ງແມ່ນເພື່ອນຳໃຊ້ເຂົ້າໃນການອະທິບາຍ ແລະ ຊີ້ແຈງຂໍ້ມູນໂດຍມີພາບ ປະກອບທີ່ແທດເໝາະກັບສະພາບຄວາມເປັນຈີງ ແລະ ອັນທີສອງແມ່ນເພື່ອໃຊ້ເປັນພາຫະນະຍູ້ໜູນໃຫ້ເກີດການ ນຳໃຊ້ແຜນທີ່ນັ້ນເຂົ້າໃນການສຶກສາ, ການຄົ້ນຄວ້າ ແລະ ການສ້າງ ນະໂຍບາຍໃນ ສປປ ລາວ. ທ່ານ ບຸນທະວີ ສີສຸພັນທອງ ລັດຖະມົນຕີຊ່ວຍວ່າການ ກະຊວງແຜນການ ແລະ ການລົງທຶນ |